Belgiyaning Gent universiteti va V.I.Romanovskiy nomidagi Matematika instituti o‘rtasidagi ilmiy hamkorlik o‘zining yangi pog‘onalariga ko‘tarilib bormoqda. Matematika instituti katta-ilmiy xodimi Erkinjon Karimov tashabbusi bilan boshlangan ilmiy hamkorlik natijasida, ko‘plab muhim ilmiy yangiliklar olindi. Mana bugunga kelib esa Gent universiteti va Matematika instituti hamkorligida qo‘shma-PhD dasturlari ham yo‘lga qo‘yildi. Hozirgi kunda Matematika instituti tayanch doktoranti Bahodirjon Toshtemirov Belgiyaning Gent universitetida qo‘shma-PhD dasturi bo‘yicha o‘qishni davom ettirmoqda. Hozirda Bahodirjon Toshtemirov ushbu universitetning matematika: analiz, logika va diskret matematika bo‘limi professori Dr Michael Ruzhansky va Matematika instituti katta ilmiy xodimi, fizika-matematika fanlari doktori Erkinjon Karimovlar rahbarligida o‘z ilmiy faoliyatini olib bormoqda. Ilmiy izlanishlar uchun esa “Singulyar kasr-tartibli differensial operatorlar qatnashgan tenglamalar uchun to‘g‘ri va teskari masalalar”ni o‘rganish asosiy maqsad qilib olingan. Ta’kidlash joizki, Gent universitetida Belgiya, Serbiya, Austriya, Gretsiya, BAA, O‘zbekiston, Qozog‘iston, Kolumbiya va yana dunyoning 10 ga yaqin davlatlaridan kelgan matematika sohasining yetuk olimlaridan tuzilgan ilmiy jamoa shakllangan bo‘lib, barcha uchun qulay bahs-muhokama markazi sifatida ilmiy seminar ham tashkil etilgan. Mazkur ilmiy seminarda institutimiz olimlari, tayanch doktorantlari ilmiy maruzalar qilib kelmoqdalar.